دنيا واحوالها غريبه
ولا بترسى فى يوم على حال
والحياه منها العلام
زى ما قالو فى الامثال
كل وقت وله اذان
وكل فوله ولها كيال
كل كتف وله حموله
وكل كتف على قده شال
حتى لو زادت حمولك
الحمول شيمه الجمال
واوعى تركع تحت حملك
لو الهموم تملا جبال
فى اللى ما يعنيك ما تدخل
واتحلى بشيم الرجال
لو عشقت اعشق قمر
دا كل مهره ولها خيال
مش اى مهره تملك زمامها
ولا تنول منها الوصال
ولو انت مش قد الخيول
اوعى ترضى بالبغال
ولو جلست بالمجالس
احترم فيها الرجال
واتادب وحلى كلامك
مش كل الكلام يتقال
بميزان الدهب اوزن كلامك
وجوابك على قد السؤال
دا كل لحن وله نغم
وكل كلمه ولها موال
واردب ماهوش بتاعك
لا نحضر شيل ولا مكيال
ولو جاورت السعيد بتسعد
لا هو بمال ولا كتر عيال
والالف ميل تبدا بخطوه
وكل رحله ولها رحال
و الصبر مفتاح الفرج
مع الصبر ما فى محال
وطاطى للريح تعدى
وعلى بابك تحط اقفال
ولا تصدق جمل للنخله طالع
دا كل نخله ولها نخال
وفى الاخر لو تقلت حمولك
خليك للحمول شيال
بقلم محمود الكومى
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.