طارت عصافيرك
***
بقلمي : عادل عبد الرازق
*********************
أنا كنت حالف مااعشقك
بس القدر رماني ف سكّتك
خادتني عيونك ولاّ شفايفك
ولاّ خادتني ضحكتك
ماعرفش ليه ملت إليكي
ماعرفش ليه قلبي ناداكي
وماعرفش ليه كنت ضحيّتك
…
ملامحك اتغيّرت بين الليالي
كل الجليد غطّى ملامحك
شط اسكندرية رماني
وانا كنت عاشق لون مطارحك
رفرفت على صدرك وغنيّت
لحقيتني لحظتها انتهيت
على أوّل خطوة ف سكّتك
,,,
كنت فاكر …
إن شفايفك لسه بتتعلّم
أتاريني لسه باتعلّم
وباشخبط على باب البيت والحاره
حبك رماني وكسرني
هزمني ولا عمره نصرني
ولضمني حرف في غنوتك
…
الشارغ قدّامنا مجمّعنا
بس انتي ف ركن وانا ف غيره
مش عارف إحنا بنعند
ولاّ بنتكسّر بإيدينا
من قلبك طرح الغدر
غرّق شطّ مدّ وجزر
…
تعبتني الطرقات والخطوة
وباعدّي في الضلمة وخايف
مررّت الأشعار اللي بتترجّى
توصل يوم بحر الأوزان
م الشارع طارت عصافيرك
ولقيتني ف وسط الغربان
***
- عادل عبد الرازق
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.