الدُنيا
عيادة
والدمع
عبادة
للبلياتشو!!!!!
كلمة قالّوها أهل زمان للعبيد والسادة
المظلوم نومهُ أمان نوم الظالم عبادة
كلمة حق للإنسان فيها الدُنيا متعادة
الدُنيا إيه غير مهرجان شا الله يا طاهرة ب زيادة
الظُلم رافع صولجان سجان ودايس ب بيادة
والحق حتماً يوم يبان وليالي فرح وسعادة
الحلو عامل دونجوان الحلوة عامله فيها غادة
الكل لابس توب جنان وجنونه خارق للعادة
إن كان إنس او كان جان تكرار وفيه ألف إفادة
الكل محتاج للحنان وحناناً فنجانه سادة
مجاريح ياليل وجروحنا ديماً ولادة
والجرح سيل جارح وماشي تاتا تاتا
طول عُمري جن وبهلوان
عاشق وعشقي البرجوان
مولود في شهر إبريل نيسان
والدُنيا عايزة الأُلعُبان
تكرارها عطر البيلسان
والصوت حنين صوت بغبغان
ولكل طير عش ومكان
وعشوشنا في الأصل عيادة
والدمع صدق وعبادة!!!
مين يا ناس عاش الحياة
من غير ما يعرف لهُ مقاس
الكل جرب الكل قاس
الكل غرب فيها وداس
أرضك و وطنك أمك أبوك
رزقك و أجلك أختك اخوك
ملعون جنون اللي جابوك
مش اختيارك ولا كان قرارك
إزاي ياهالك زي الممالك
تشتريهم ب الفلوس
الرب مالك
للمشاعر والنفوس!!؟
شعر
عامي
للبلياتشو
وليد حسانين
28/12/2020
القاهرة...مصر...
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.