((ضمير ميت))
ومكرفون عمال ينادي
العزا من ع المقابر
اللي صاحي
يقوم يبلغ اللي نايم
مااااات الضمير
وفى العدم كل الضماير
الدفنا فى قبور المظالم
الوضوح ماكنش نافع
ليه الوضوح
وع الحقوق فى الأصل جاير
الطماع وإبن الربا والمرتشي الكل داير
واللي غش واللي باع ضميره بقرش
واللي عاملين فيها طرش
واللي سرق جيوب الغلابة الشقيانين
و ١٠٠ يمين الطبع دا مش طبع دين المسلمين
كترت رشاوي
كترت فتاوي
وكل الفتاوي
تحلل فى دم الغلابة
وتنصف ديابة
بينهشوافى لحم البشر
أصل الغلابة فى البلد كمالة عدد
مخلوقة للتصقيف
مساكين ومن غير سند
غلابةطالبين المدد
لاكان فى يوم ولا يوم خطر
نبيع الضمير
ونحصد ذنوب زي المطر
فين الرقابة
ياريت تقولوا اللي إندفع هو خلاص
ولا يادوب عرابين
إبن البلد اللي معاه
واحنا يادوب معازيم
وإحنا اللي فينا العزا
وتتنفذ القوانين
ندفع عشان نعيش
ولحقوقنا مش طايلين
مقدر ومكتوب بختنا
رغم الإنوف صابرين
العرس مش عرسنا
بنضحك على نفسنا
وبكره يجي عندنا
ونكون بني أدمين
ساعتها تولد ضماير
تحس بالمساكين
وتحيي فى أرض الغلابة أمل
ماااات بقاله سنين
يرسم فى كف الشقا
حياه لها عناوين
نبيل عبد الحليم
٢٧/٦/٢٠٢٢
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.