( فاكرة )
بقلمي الشاعر/ محمد غبن
شاعر آل غبن بمصر والشتات
كلمات عاميه بلغة محكيه
1/12/2022
فاكرة أول لقاء كان
بينا وإحنا صغيرين
كنا أطفال قلبها
مليان رقة وحنين
بنلعب في الشارع
زي اي اتنين والسلام فرحانين
إستغمايه أو اي حاجة كنت
بتشوفيني قد ايه بخاف عليك
من اي حد أو م الهوا
اللي بيعدي حواليك
اي حد يغتت أو
يستظرف يعمل فيها فله
كنت بحسسه إن ليك
حد مش لوحدك أو إنت قلة
كنت بقول لنفسي خوفي
عليها علشان إحنا جيران
كنا اطفال بريئة وقلوبنا فرحانة وحاسه بالأمان
وسط أهالينا وعينيهم
اللي كانت بتدعي خالق العنان
و لما كبرنا حسيت بشعور
غريب بيشدني ليك وحواليك
بصراحة لقيت فجأه قلبي
بدأ ينشغل ويكلمني عليك
قولتله اعقل إيه ياقلبي
أنا فين وهيا فين
أبوها رغم إنه جارنا
لكنه من الأعيان المبسوطين
خايف أتقدملك يفكر
إني طمعان في فلوسه والفدادين
وأنا وحياتك مش عايز غير
موافقته وشنطة هدومك
نعيش حبايب لكن ما
أعيش دنيتي دية من دونك
حبنا من الصغر إزاي نفرط فيه
وضمايرنا تلومني و تلومك
ع العموم اصبري وكل
حاجة وليها حل ومفتاح
أكيد أبوك ليه حد سكته
اصبري الوقت معانا براح
بس مخبيش عليك خايف منه
وتضيعي وأعيش من غيرك سواح
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.