اصبر على الشدايد لا تفگرله
ولا تنخه بشر ربك تراا يحلها
خل عينك بعينه وهوا راعي الرأي
وسنين العسر بيده يسهلها
صح العوز يكتل لذة الإنسان
بس روحك عزيزه ولا تذللها
افرشلك رمل واشرب ندا العاگول
ولا تضعف أبد والدمعه تهملها
سلم للإله ونام طول الليل
هيه الدنيا دنيا لا تحسبلها
ساعة مهلهله وساعة تحضر گبور
وساعة ملخبصه وساعة سهل حلها
يوسف عبد وبسوگ النخاسه انباع
وتاليها عزيز وملك صار الها
النخل لو طاح سوه جسر هاي الناس
وعگب ذاك الشموخ ابحبل تسحلها
أحذرك تنحني وتفرح الشمات
الهامه اللي نزلت هيهات تعدلها
خل راسك علم مرفوع فوگ الغيم
وذا جت المنيه ارگاب عد الها
ضياء عيال ✍️
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.