مسافات...بقلم خالد جمأل
مسافات
ليه بيني وبين حبيبي
دايما يا ناس مسافات
أقرب لي من نن عيني
بس ف هواه مسافات
م الشوق بعِدّ الليالي
وعليا كام مِسا فات
امتى هيرأف بحالي
يرحمني م المتاهات
امتى يحقق آمالي
يمسح ف عيني الآهات
ده مفيش ف القلب غيره
لو شاف بنات اُلُوفات
اتنين تفكيرنا واحد
ومفيش ما بينا خلافات
اخلاقنا وطباعنا واحدة
جمعانا حتى الصفات
طب ليه مش حاسّه بيا
وانا شوقي ف عيني بات
متشاف من أي زاوية
مقري بكل اللغات
لفيت على كل داجل
وصاحبت العرَّافات
حلِّلت انا لِيه وليّا
خدوا مِنّا العينات
يمكن تكون القضية
هيه اختلاف الجينات
طب امتى هتحس بيا
لو عمري يا خلق فات
لو روحي مابقتشي فيا
والقلب يكون رُفات
لو مش مكتوبلي حبِّك
هفضل احب ف سُكات
لو حتى ناسيني قلبِك
عاشقِك لحد الممات
بقلمي/ خالد جمال ١٩/٧/٢٠٢٥
تعليقات
إرسال تعليق