ست الحسن ..الشاعر: حليم محمود أبو العيلة
ست الحسن
يا نبضْ القصيدة وعطر المكان
وتراتيل حمام سلام وهديل
صوتْ المطر بِيْدُقْ ع الإزاز
صحاني من نومي ف نُص الليل
وشذا ريحانك ف القصاري
ورود ترقص وتْمِيل
وأريج عطرِك جِوايا فايح
وريحته متعتقة ف بَراميل
قهوتِك بتغني فِ الفنجان
بصوت حليم وعزف الطويل
وقلبك باين فوق وِشها
مرسوم قلوب كتير بالهِيل
وقلبي رقصْ فوق شبابيكِك
علىٰ أنغام صهيل الخيل
دا عودِك ولا عود لِبْلَابْ
غادة هيفاء بخصر نحيل
وفرحتْ أيامنا بلقانا
وذكريات الزمن الجميل
ومرايتي اتزينت بيكي
وحسدتني ع الرمش الكحيل
علىٰ ضهرك سبايك دهب
أطول من جريد النخيل
وضِحكتِك مع غمازاتِك
جمال له ألف معنىٰ ودليل
نظرة عيونِك قصايد
تتغنىٰ ف شتا الليل الطويل
يا ست الحُسن يا مطر ونيل
يرويني شهد سلسبيل
يالوحة مرسومة بقلب فنان
وروح شفافة تشفي العليل
كلماتي:
الشاعر: حليم محمود أبو العيلة
مصر
تعليقات
إرسال تعليق