لام شمسية//بقلم أ. حليم محمود أبو العيلة
لام شمسية
لام شـمــســيـة وعـايـش تـمـلي
بــرة الــمــسـرح والــكـوالـيـس
قـاعـد وحـدانـي كمان ف الضل
وبــعــت الــدرع والـمــتـاريــس
دُمْـيَة بـدون روح وخـيال مـأته
وتاجـروا بالـحُـب والأحـاسيس
بـيـن قوسـين محبوس يا ناس
مـحـروم مـن نـور الـفـوانـيـس
مخدوع ما بين ضباب وسراب
زهـقـت ي خـلق مِ الـتـدلـيــس
وحداني قلبي ما بين ضـلوعي
والـحـق ف هـامـش الكراريـس
كـلام ف كـلام بــدون أفــعــال
ويـامـا كنـت فـنـجـري وفَيِيس
كـلامــنـجـي وِبَــبْـدُر الأشـعـار
يـفـتـح لـلــقــلـوب تـرابـيــس
عـايـم ضـد الـمــوج والــتـيـار
وحـيـاتـي صحارىٰ وتضاريس
ركــام ســاكـن جـوايـا جـبــال
وشَـعْـرِي شـاب ولـسه عـريس
وإرادة فـؤادَة مـعششة جوايا
وزيـهـا هــفـتـح كـم هـويـس
ونـفسي أخد بتاري من نفسي
وأجي على قلبي كما عتريس
واكـبـش حـقي مِ الدنيا بقوة
واصحىٰ وافوق مِ الكوابيس
كلماتي:
الشاعر: حليم محمود أبو العيلة
مصر
تعليقات
إرسال تعليق