مهما لاموني...شعبان محمد بدر
حبيبتي مهما لاموني
وعدوا عليا أنفاسي
وقالوا إني ليك بايع
وطعنوا ف دمي وأساسي
....
انا اللي شراعي في نيلك
وانا الفجر في سواد ليلك
وانا في الضلمة قناديلك
وانا الحلم اللي مستني
تعدي الهوجة ويجيلك
..
وانا اللي دموعي علي خدك
وأنا اللي تعبت من صدك
وانا المغرم وأنا المجنون
وانا العاشـق
ورغم الهجر سهم هواكي
فيه راشق
وأنا الورد اللي ف جنانينك
وفتٌٓح لأجل ما يحايلك
يسدد قسط ف جمايلك
بدون ما ياخد الايصال
وأنا الضهر اللي عاش شايلك
برغم القسوة في عمايلك
وانا الإبن اللي عاش لك بار
وأنا مدك وانا جزرك
وأنا موجك وأنا الإعصار
وأنا الطلقة اللي ضارباها
علي عداكي وواخدة التار
وانا الامل اللي لسه ما زال
فارش علي كفي ليكي نهار
بقلمي
شعبان محمد بدر
تعليقات
إرسال تعليق