سلامات يا حلم ..شعبان محمد بدر
سلامات يا حلم
راكن على الإسفلت
مستني ف كمين
مش لاقي واسطة تدفعك
ولا لاقي تدفع للأمين
ولا دعوة لأمك تنفعك
ولا نور ف فجرك من سنين
.....
سلامات يا حلم
راسب بتقدير إمتياز
في كشف هيئة ما حبنيش
فرصك خيوط من الوهم
أضعف من خيوط دخان
لسيجارةملفوفة حشيش
عايش مدان بجرم جاهز
جوة دفاتر متخمة
ف محاكم التفتيش
..
سلامات يا حلم
عايش على إستحياء
والصمت في بلادك قانون فمتشتكيش
حرفك ما هوش للنشر
وما لكش فرصة ف دور نجاح
ولا كتبوا اسمك ع الافيش
فاسكت عشان الحرف تمنه سنين
وساعات بيغلى ويبقا تمنه رقاب
ويقولوا دول حرافيش
الرضا بالظلم عادة
أجرها بمليون عبادة
ولا يمكن ما تجازيش
....
يا حلم واقف ع الرصيف
صاحي بتحلم بالرغيف
لو سباق كان ليك لوحدك
فالأكيد هتكون وصيف
....
الكلمة بتريح ضمير
بس مش هتسد جوع
ولا حتى هتهد العروش
ولا هي منديل للدموع
ولا هي ف الضلمة الشموع
عايش بتحلم بالخلاص
بس أملك صار فاشوش
حظك وراحة البال سابوك
ولسه حتى الآن ماجوش
ربان سفينة بدون ملاذ
وفقدت فرصك ف الرجوع
والدنيا حواليك مبهمة
قلبك صبح موجوع
بقلمي
شعبان محمد بدر
تعليقات
إرسال تعليق