جراب الأماني...ا. علي درويش
جراب الأماني
***
ماسك في ايدي بالقلم
وف قلبي حابس ميت ألم
العمر ضاع مني هدر
دايس على صبري بقدم
ودايما لتحت يشدني
اقوله سيبني اطلع لفوق
احلم واطير زي العلم
انا نسر لو مكسور جناحي
أعرف اطير بجناح ورق
من غير خوف أو قلق
وكلمتي مبدأ حياتي
بقولها ومخافش الندم
ستين مرت وازيد شويه
وجرابي فيه الف أمنيه
لكن سباط النخل عالي
ومهما بطلع ، لسه تحت
يقولي حتى لو نجحت
عمرك في يوم متكون علم
بحرك غويط ملوش أرار
عاصف وموجه طافح مرار
وانت قبطان بس خايب
بقفطان وعمه وجلابيه
معقول هتوصل بالمعديه
والا الغرق أمره اتحسم ؟
قلت الأمل بالصاري متعلق
يمكن بكره الحلم يتحقق
وعشان فجري يشوف النور
لازم الوهم يتمحي ويزول
واغلب اليأس لو كان غول
وابني لأحلامي برفاته هرم
علي درويش
تعليقات
إرسال تعليق