كان
كان عليك
تهضر وتتكلم
تشرح لي وتقول
اشنو واقع واشنو
كاين
تفهمي ونفهم اشنو
بغيتي تقول
وكان علي نتسنط
ونسمع
نفهم كلامك
وما نبقاش
ناول ونتقول
كلها وقرايتو
وكلها وفهامتو
وفي وصلاتو
كان عليك تتشجع
وما تبقاش ساكت
وتخلي اللي ما يهمو
الأمر
يزيد في الشركة
يتكلف ويهضر
وكان علي نصبر
ما نسمع من هادا
ولا نديها في كلام
هادا
اللي كال ليك
يكول عليك
وفي نص الطريق
يمشي ويخليك
ما انت هنا
وما انت لهيه
وكان عليك
تعرف
وتقرى بنادم
من العينين
ياك صحبتنا هادي
من سنين
واخا كنا نتقلقو من
حين لحين
كنا نفهمو بعضياتنا
من العينين
ماشي دغيا دغيا
نوليوا مفرقين
ومخاصمين
ما عرفتش واش
هادي تابعة ولا عين ؟
فين ايامنا الزينة
وفين القلب الحنين
وكان علي نصبر
صبر ايوب
ولا حد يعرف اللي
في القلوب
نواجهو الزمان
ونصرفو المكتوب
يتفضح السر ويبان
الملعوب
والمكتوب ما منو
هروب
كان عليك تحتاط
شحال من مرة
وما تقول خاصنا نفكو
هاد الجرة
وكان علي نفكر
بزاف هاد المرة
نفكر الف مرة
ومرة
حيت ماشي كل مرة
تسلم الجرة
كلمات... خالد فولان.
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.