انا اللي استاهل
علي كفي قايد من قلبي شمعه
في قلبي شايل جبل الهموم..
بعت ليها قلبين ودمعه..
بعتت لقلبي ريح السموم..
وكنت فاكر ايامنا راجعه..
واللي في قلوبنا ممكن يدوم
اتارى ظني..غريب كأني. .
مولود ولسه من غير هدوم
تمثيل محبه..بالغش لكن
جوه قلوبهم أسود وداكن..
وضحكه صفرا..ماتدومش يوم
كان ليه اامن ..لقلب خاين..
والغش باين..ملو العيون..
لعب بمشاعر..غش ومظاهر..
ودمعي سايل..بل الجفون
.... ..... ......
يا ناس وناسيه..ياقلوب وقاسيه
قلوب وخاينه..حقيقة باينه..
مش ظلم مني..ومش ظنون
الدنيا أصلا دى كاس وداير..
راعوا الضماير..يمكن تهون
بكره يجيي لكوا اللي شبهكم
تشوفوا منه عجب العجاب..
الكدب طبعا ملو الخزاين
والغش اصلا بلغ النصاب
سواد قلوبكوا والكدب واضح..
والغش باين علي الوشوش
ضميركوا نايم في دنيا تانيه
فلو سمحتم..ماتصحهوش..
.... ...... ....
انا اللي جايب مرار لنفسي
عشان شاريكوا..ومش ببيع
ولسه ياما..اشوف واقابل
عايش بقلب مولود رضيع
اللي عملته..قاعد باقي لي
وعند ربي..مش راح يضيع
في كل ركعه بدعي لربي..
وربي عالم..هو السميع.
..... ........ ......
شعر/نصر سيد بدر..القاهره.
@ اشاره @الجميع
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.