دفتر أحوال 9...م. حمدي توفيق
دفتر أحوال 9
................
دفتر أحوال
وفى كل مجال
هتلاقي دفاتر مكتوبة
ومابين الفايز والخسران
هتلاقي
أحلام ... معطوبة
وناس أسماءها مع
الفايزين
وناس أسماءها مشطوبه
وناس علطول عايزين
وناس من كُتر مفيش
عايشين بالدين
وفي صفحة دفتر أحوالهم
مكتوب ناس منكسرين
وناس صفحات
دفاترهم
بتزهزه .... نور
عايشين الدنيا بتفاصيلها
من هَنا ... لسرور
ولا فارق ابداً وياهم
أسعار ع العالم عماله بتجور
وليلهم ونهارهم
مسخرة وفجور
ويقولوا عليهم الصفوة
مغفوره كل تفاهتهم
والباقي ... يغور
أنا آسف ألفاظي خانتني
وحماقة قلمي سبقتني
بس أنا معذور
دفتر أحوالي مفيهوش
ولا حلم ... بيتحقق
كله .... مبتور
وأنا زيي ... زي بقيت الناس
مستني حظي
يتَعَدل ويجيني الدور
وأحوالي كلها تتبدل
لهنا وسرور .... لكن أنا عارف
إن دا أمل كداب
وإن مع همومي
مكتوب لي ... كتاب
فبلاها معانده ومنهاهدة
وعلى كدا بقا
نقفل على روحنا
مليون ... باب
وربك ... واهاب
دفتر أحوالي ملازمني
متسجله فيه كل
الأحداث
مكتوبة كمان تفاصيلي
وماليش دعوه خالص
بالناس
وأنا راضي باللي
مكتوب لي ... إن كان
حلو .... أو مُر في كأس
وكل حمولي راح أرميها
على رب الناس
......
قلمي
م . حمدي توفيق
تعليقات
إرسال تعليق