عايزة إيه مني يا شاطرة؟..ياسر أحمد
عايزة إيه مني يا شاطرة؟
يا أم طلة حلوة وبهية
عايزة يا عمو حياة
عايزة روح ترد فيا
عايزة أعيش طفولتي
عايزة قلب فيه إنسانية
عايزة ناس ما أهون عليهم
زي ما بيهونوش عليا
عايزة أمحي البذاءة اللي شاعت
عايزة أخلاقنا اللي ضاعت
والعادات الحلوة ديا
عايزة ناس ما بيكدبوش
همهم مالي الكروش
اللي علشان مصلحتهم
في ثواني يضحوا بيا
ولا أقولك.. عايزة حاجة رايحة مني
عايزة كسوف البنات
عايزة روحنا الخفيفة
والأدب في الكلام قبل السكات
وعلشان يكون عندي رزانة
عايزة للساني رباط
أحمي بيه نفسي يا عمو
من الغلط والانفلات
وعايزة حاجة غالية خالص
عايزة حياءنا اللي مات
وعايزة شوية بخور
أقضي بيهم على الآفات
وهات يا عمو لو سمحت
هات شوية ذكريات
هات حبايبنا اللي راحوا
وهاتلي عمري اللي فات
وهاتلي ضحكة تسر قلبي
أشق بيها السكات
ولو سمحت لو هتقدر
شوفلي عندك جبر خاطر
شوف وطيب الخواطر
ولو يكون حبة فتات
من أحلا دكان ذكريات
☘️☘️☘️☘️☘️
بقلمي ياسر احمد
تعليقات
إرسال تعليق