يحدث ليلا خلف الأبواب المغلقة ..سحر محمد

 يحدث ليلا خلف الأبواب المغلقة 

بعد زواج أولادي الثلاثة بقيت عايشة لوحدي ولأنهم بعيد عني ومنهم اللي مسافر برة مصر  ففكرت إني اأجر اوضة في الشقة لطالبة أو بنت مغتربة عن القاهرة واهي تكون ونس ليا في الشقة، نزلت إعلان ع الفيس فيه عنواني ورقم تليفوني، وبعد نزول الاعلان بدأ يجيلي رسايل من بنات كتير ، منهم بنت أول ما شفتها فكرتني ببنتي الصغيرة اللي توفت في حادثة وهي في الكلية فمترددتش وسكنتها فورا، البنت كان اسمها ليلى كانت من بلد صغيرة في الأرياف وجاية القاهرة تشتغل، حبيتها جدا وقربت منها وواحدة واحدة مش بس بقت ساكنة معايا ده انا كمان طلبت منها تاكل معايا لأني لاحظت انها بتجيب معاها اكل من برة كل يوم، وبقيت بسألها بتحب إيه واعمل الأكل اللي بتحبه، كان كل شيء طبيعي كل يوم ليلى تنزل شغلها الصبح ترجع ع الساعة ٧ نتغدا سوا ونقعد نرغي مع بعض عن شغلها ويومها لحد ما تنام.

وفي يوم دخلت ليلى تنام ودخلت أنا اوضتي وقبل الفجر بساعة زي كل ليلة قومت عشان اتوضا واصلي القيام، لقيت في صوت غريب طالع من اوضة ليلى مفكرتش كتير وقولت يمكن تكون مشغلة فيلم ولا حاجة، بس الموضوع ده بقى بيتكرر كل ليلة، لحد في يوم ليلى وهي راجعة من الشغل لقتها جايبة معاها قطة وقالتلي لقتها في الشارع صعبت عليا جبتها معايا، دخلت ليلى اوضتها والقطة معاها وبالليل في نفس الوقت زي كل ليلة سمعت صوت القطة كأنها بتصرخ خبطت ع الباب وسألت ليلى فيه ايه ردت عليا

مفيش حاجة يا ماما(زي ما بتناديني دايما) دي القطة بس مش واخدة ع المكان

صليت واستنيت الفجر وبعدين صوت القطة هدا قولت اكيد نامت، بس الغريب ان ليلى صحت تاني يوم نزلت الشغل والقطة مش معاها، قولت جايز سايباها في الاوضة لكن مكنش فيه صوت للقطة نهائي اخدني الفضول وفتحت الباب ولقيت حاجة مكنتش اتخيلها لقيت القطة مدبوحة في الأرض ومرسوم بدمها ع الحيطة رسومات ورموز غربية صرخت من خضتي وجات جارتي على صوت صرختي خبطت عليا طلعت قولتلها اني لقيت فار  في المطبخ عشان كدة اتخضيت وصرخت، قفلت الباب وقعدت في الصالة مش قادرة اتلم على نفسي واعصابي مش فيا، فكرت ابلغ الشرطة بس قولت استنى ليلى يمكن يكون لها تفسير للي حاصل.

لما رجعت ليلى وسألتها أنكرت وقالتلي انها متعرفش حاجة وان اكيد في حاجة مش طبيعية في الاوضة عشان يحصل اللي حصل ده، دخلت أنا وهي وشالت القطة في كيس ونزلت بها ورجعت بعد شوية ونضفت الحيطة والأرض وكأن مفيش حاجة حصلت، عدا ليلتين من غير ما يحصل حاجة تانية بس نفس الأصوات الغريبة اللي بسمعها من اوضة ليلى كل ليلة، وفي الليلة دي رجعت ليلى من شغلها كان فيها حاجة غريبة مش فاهماها كأنها مش ليلى كأنها حد تاني صوتها وملامحها فيهم حاجة مش مظبوطة، دخلت ليلى اوضتها من غير ما تاكل ولا تقول لي اي كلمة غير كلمة واحدة بس قالتها ودخلت الليلة دي الليلة الأخيرة، مفهمتش هي تقصد ايه بس قولت يمكن في حاجه زعلتها وهتسيب البيت، حاولت اكلمها مردتش، دخلت اوضتي وقولت الصبح هتكلم معاها، بعدها بكام ساعة لقيت ليلى داخلة عليا اوضتي وشكلها غريب جداً يخوف ملامحها كأنها شيطان وفي اديها سكينة وبتقولي بصوت مش صوتها سامحيني بس هما طلبوا مني اني اقتلك عاوزين دمك وانا لازم انفذ اوامرهم، فضلت اتكلم معاها يمكن ترجع لوعيها لكن كانت بتقرب مني وعنيها كلها شر قومت من السرير  وحاولت ازقها طلعت تجري ورايا لكن قدرت اطلع من الاوضة وقفلت عليها الباب، فضلت تخبط ع الباب وتقولي هقتلك لازم تموتي الليلة دي وإلا أنا اللي هموت هيقتلوني، جريت ع باب الشقة وخبطت ع جارتي استنجدت بيها وبلغت الشرطة، الشرطة جت وقبضوا عليها، ليلى كانت بتعاهد الشيطان وكان لازم تقدم له دم عشان يكون في خدمتها الأول كانت القطة والقربان التاني كان أنا، ليلى اتقبض عليها وعرفت بعد كدة ان تم تحويلها للعلاج النفسي واللي لقوها بعد منتحرة في غرفتها داخل المستشفى، وانا قفلت الاوضة دي للأبد، ولكنني مازلت أرى ليلى كل ليلة.

سحر ابوالعلا