. دقيقه حداد ..// الشاعر المبدع : النميرى نافع.

Nmnm Said

السلام عليكم ورحمة الله وبركاته..
... دقيقه حداد ...

دقيقه حداد..
يا ترى دقيقه حداد..
تكفي الحزن اللي احنا فيه؟؟؟
ولا محتاجين..
ساعات..
وأيام..
وسنين!!
متهيألي محتاجين عداد..
سؤال متعاد !!

طب تعالوا نقف كم دقيقه حداد..
ع اللي فاكرينه..
وع المعتاد..

دقيقه حداد ع الغلبان..
وعلى عمره..
اللي فات مقهور..

دقيقه حداد على الغلب...
وعلى رغيف العيش ف طابور..

دقيقه حداد على لقمه..
ويا دوبك بتمسح زور..

دقيقه حداد على صمودك..
دقيقه حداد على الجدعان..
على حدودك...
دقيقه حداد على المظلوم ف سجونك..
دقيقه حداد على الغرقان ف سكونك..
دقيقه حداد على ثوره بشبابها راحت فدوى لعيونك..
دقيقه حداد على المكشوف وع المستور...

دقيقه حداد على قلب..
فقد أمه..
ولساه قلب...

دقيقه حداد على قلب..
فقد اب...
ولساه صلب..
دقيقه حداد على المقبور..

دقيقه حداد على فنك..
وعلى أدبك..
وعلى شعرك..
واللي تاه في دواوينك..
دقيقه حداد على قلمك..
صبح مكسور...

دقيقه حداد على نيلك...
وعلى هرمك..
وعلى أرضك..
بعد الخير..
صبحت بور..

دقيقه حداد على طهرك...
دقيقه حداد على شباب ماتوا عشان مهرك..
دفعوا حياتهم تمن غالي عشان عهرك...
ولسه شباب تاني..
عليه الدور..

دقيقه حداد على الجيره..
وع العشره..
دقيقه حداد على وشوش مبتسمه...
ومن كتر الهموم بقت كشره..
دقيقه حداد على الضهر..
اللي بات مكسور..

دقيقه حداد على ولادك...
وعلى بناتك..
دقيقه حداد على قيمهم وأخلاقهم...
بقت ذكرى..
وفاتها الدور...

دقيقه حداد على التعليم..
كان طباشير وسبوره..
كان بكتاب..
صبح بالتاب..
دقيقه حداد على العقل اللي كان صاحي..
وبات مخمور...

دقيقه حداد على العدل وع النخوه...
صبحوا سراب..

دقيقه حداد على طريق كان نور...
صبح ضلمه..
وبات مهجور...

دقيقه حداد على اللمه وع الصحبه..
دقيقه حداد على التعديل
وع الدستور...

...... تحياتي
النميرى نافع.