صباح يوم سعيد
على الصحبة والأحبة
يجعله يوم جديد
مليان بدموع الفرحة
ويجيلنا الرزق ويزيد
بالرضى والبركة
صباح يوم نبدأه
بكام ركعة وسجدة
وأحلا فطور ع الصبح
فول وطعمية وسلطة
ولو لقمة بحبة دقة
ربنا يزيدها ويحفظها نعمة
صباح الخير على جيرانى
وإزيك ياخالة فاطمة
مش عايزة حاجة أجبهالك
تسلم ربنا يديك الصحة
قلوب طيبة وصافية
عمرانة بالخير والمودة
صباح الأيادى الشغالة
طول النهار أو السهرة
ويروا الأرض العطشانة
بنقطة العرق الطاهرة
نفس عزيزة وعيون مليانة
وبالقليل قانعة
والناس الطماعة والحسدة
فى وسطنا مالهاش لازمة
صباح الخير ياأصيلة
من الفجر بتغسل الهدمة
وطول النهار شقيانة
وعن حياتها راضية
إيديها فى إيد جوزها
سند وعكاز وقت الحوجة
جبل من الصبر والشدة
وأنوثة وحنان وخفة
صباحكم يوم أبيض
يشبه عروسة بالترحة فى الزفة
جلال حسين
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.