يا مرايتي
يا مرايتي
يا مرايتي قولي لي
إيه اللي جوايا اتكسر!؟
غير ملامحي وابتسامتي؟
ودمعتي وياها حيرتي؟
ايه واجعني وايه حكايتي؟
بتقولي ايه ؟
سمعيني ؟
بتقولي قلبي؟
لا ... مش مهم
قلبي ياما
حقه في الدنيا اتهدر
ووجعه عارفه
شايفه سيف
لكن بينحت في الحجر
ألمي الساعة دي
حاسه أقوى
شايفه أعفى
زي روحي فاتتني وحدي
وتوهت منها في قلب منفى
إوعاك تكوني
إنتي يانفسي
اللي بكيانك اتغدر ؟
إياك تلومي إلا روحك
قومي بايديكي واكبري
وداوي جروحك
وارسمي عالشفايف
ضحكة وياها جموحك
واصرخي داخل سكوتك
واخرسي
مهما يملا الدنيا صوتك
من النهاردة اتعلمي
هتعيشي عمرك
تندمي وتتألمي
يامرايتي حقك
بيعي فيا واشتري
كذبت صدقك
وكنت دايماً مفتري
بقول غبيه ومفترية
وبتظهر العيب اللي فيا
جيت النهارده
بعلو صوتي بقولها ليكي
يا مرايتي أنا
حقك عليا
أمل_أمين_الخولي
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.