أنا سياسي
كلمات..............أيمن البكرى
وأهي ماشية
يوم حلوة ويوم وحشة
ويوم قاسية
يوم بضحك ويوم ببكي
ويوم جارحة
يوم بحزن ويوم ببقى
طاير من الفرحة
يوم بيعدي كأنه كابوس
بتمنى إني لو كنت معشتوش
ويوم بتبقى
عروسة لابسالي الطرحة
أنا سياسي
بسايس الدنيا علشان أعيش
وبحمد ربنا
على اليوم إل بيعدي
فيه ما أبكيش
بتاخدني الدنيا
قلمين على وشي
وتسلمني للأيام
أبقى مستني
حد يقولي معلهش
ألاقيها بتهدلي أحلام
أيامي كلها
بقت شبه بعضها
وزى ما بصحى بنام
ولو حد سألني عامل إيه
بكدب عليه وبقوله كله تمام
أنا سياسي
بسايس الدنيا والناس والأيام
لا عمري ببيع ولا عمري بخون
ولا بعرف أكون قاسي
ومهما تجي الناس عليا
ومهما تبكي عنيا
بعدي وبقول ماشي
الكل ناسيني نفسي ياعيني
نفسي ألاقيني
على برك في يوم رأسي
أنا سياسي
بسايس الناس
ياما اشتريت غالي
وباعوني ببلاش
وياما عيون فيهم
بتوحشني
وأبقى عايز أجري عليهم
وعزة نفسي بتحوشني
وياما ناس بتسامح وتنسالهم
وتقفلك على غلطة مبتنساش
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.