عادي جداً // كلمات.أ.أيمن البكري
عادي جداً
كلمات.............أيمن البكري
بقينا فى زمن العجايب
الضمير جوانا مات
والشهامه والجدعنه والطيبه
بقت مجرد كلمات
والعدل فى حياتنا غايب
ومع كل أدان بيدن
عمرك فكرت هو حصل إيه
ليه دلوقت كل شيء
بيحصل بقا عادي جداً
عادي جداً
شاب بيدبح بنت فى الشارع
قدام عيون كل الناس
وتسأل السبب كان إيه
إتقدملها وموافقتش عليه
قتلها فى لحظه
إتعدم فيها من الإحساس
عادي جداً
واحد يخطف طفله
يغتصبها ويقتلها
والتانى بيدوس
على شرف غيروا
وكل يوم يسيب واحده
ويدور على غيرها
وواحده قتلت جوزها
إتفقت عليه مع عشيقها
والتانيه قتلت واحد
قال إيه وجودوا كان مدايقها
حاجات غريبه بنشوفها
ولا عمرنا كنا نعرفها
ناس مريضه عقول جاهله
حكايات من كتر ما بنسمعها
بقت حاجه عاديه
لو نفهم بس ياناس
إن الدنيا دى فانيه
ومفيهاش حاجه مستاهله
عادى جداً
أخ بيقتل أخوه
علشان سبب تافه
وإبن بيضرب أبوه
ولد عاق وسافه
وواحد معندوش قلب
بيرمي إمه فى الشارع
وواحد بيصرخ ياخلق ياهوه
والكل عامل مش سامع
وواحد تاني بيغني
وبيرقص فى الجامع
عادي جداً
ناس إنته بتبنيهم وهما بيهدوك
خايف قوى عليهم وهما بيكسروك
ومع كل حبك ليهم بردوا بيكرهوك
وإنته لسه شاري وباقي
وحكموا عليك حكم نهائي
من غير حتى ما يعاتبوك
عادي جداً هتلاقى ناس
معدومه من الإحساس
كل همها تجمع فى فلوس
وناس تانيه حابه تشوف
ناس عايشه فى رعب وخوف
وناس تأخدك على خوانه
وناس بتلعب على المكشوف
وناس من أفعالها
بتحب تدمر غيرها
مينفعوش يكونوا بشر
دول يتسموا وحوش
عادي جداً هتلاقي
حاجات كتير إتغيرت
وأخلاقنا وضمايرنا
إتشتت وإتفككت
ويدوبك إل منها باقي
شوية رحمه فى قلوبنا
هى كمان إختفت
ياناس فاتحه لشيطانها الباب
إفتكروا إن الدنيا يدوب رحله
وإن فيه أخره
وفيه جنه ونار وحساب
وإنت إل ب إيدك
هتكتب نهايتها نعيم ولا عذاب
تعليقات
إرسال تعليق