يا غربة ليه بتنادي
يا غربة ليه بتنادي؟
وهو الفراق محتوم؟
كل اللي قربه دوا
إزاي نفارق يوم؟؟
الدنيا مش بس ونس
الدنيا وجع وهموم
بتدي ناس بالعافية
وبتدي ناس بالكوم
تجري زي الوحوش
والرزق شيء مقسوم
والدنيا دوارة
ولا فيها حاجه تدوم
ناس بتصرخ وجع
وناس الوجع مكتوم
بتشكي لرب الناس
وكل عشاهم صوم
يا رب إنت الكريم
وليك القدر معلوم
كتبت علينا البعاد
يا ألف حسرة وشوم
بعد الأحبة سهر
يحرم علينا النوم
يا شمس ليه غبتي
مليتي حياتي غيوم
يا ريتك يا قلبي صخر
او م الهوى معصوم
لكنت دقت الهوي
ولا منه أبات محروم
أيمن فوزي
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.