“وحشاني يامه
========
وحشاني يامه وحشاني يامه
أيامي من بعدك ضلمه
و سنيني بفراقك عتمه
تايه يا أمي في الزحمه
مش لاقي في بعادك رحمه
الضحكه راحت و البسمه
مرعوشه في إيديا اللقمه
و بتبكي علي جسمي الهدمه
_______
وحشاني يامه وحشاني يامه
وحشني حضنك الدافي
وحشني قلبك الصافي
بحرك يا أمي كان وافي
حاضن سفينتي و مجدافي
________
وحشاني يامه وحشاني يامه
كنتى إبتسامتى فى اللفه
كنتى هنايا فى الزفه
كنت بشموسك باتدفى
كنتى القمر لما اتخفى
كنتى البساط لما اتكفى
كنتى الشرف كنتى العفه
_________
تعاليلي يامه في منامي
حلي سنيني و أيامي
قنديل ينور أحلامي
ترياق و بلسم لألامي
________
وحشاني يامه وحشاني يامه
يامايا طاير من الفرحه
في الجنه شفتك بالطرحه
عروسه و الحور حواليكي
بيغنوا ووشوشهم سمحه
_________
وحشاني يامه وحشاني يامه
يامايا قلبي يناديكي
ضميني مدي لي ايديكي
لو تؤمريني راح اجيكي
و بنبض قلبي هدفيكي
و العمر راح أوهبه ليكي
و بكفني يامه هغطيكي
سامحيني يامه سامحيني يامه
========
بقلمى سامح توكل أبوالسبح
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.