أنا أبويا مات
بقلم ماجدة البهيدي
============
زي انهارده انا ابويا مات
كان لسه في بنا حاجات
معملنهاش و لا قولنهاش
على غفلة سابني و من سكات
يا ريته بس كان حبة عاش
ده العمر بعده راح بلاش
وانا بس ايه مصبرني بعده
غير انه جوه في قلبى عاش
بعدك مش لاقية الحنية
والدنيا بقيت صعبة عليا
محتاجة لحضنك يا حبيبي
يا اغلى من ضي عينيا
من بعدك حاسة إني وحيدة
ولا حاجة في حياتي جديدة
اه يا سندي وضهري يا أبويا
ما فاضلي إلا التنهيدة
ولا صاحب جمبي ولا حبيب
من بعدك ما في حد قريب
ولا ايد تمسح دمعة عيني
ولا في غيرك ليا طبيب
كان حضنك وحده يكفيني
والبسمة دي منك تحيني
و انا جمبك يابا مالكة العالم
و دلوقتي مين هيهنيني
بنداه اسمك كل شوية
وكوباية الشاي أهي بأديا
وبقولك انا جيت يا حياتي
وبمليون الف شربة هنية
واتريني نسيت انك ميت
والحزن بقي ف قلبى مبيت
والبوم عشش ع باب بيتنا
والقلب صبح عايش ميت
يا شقيق الروح قبل ما تروح
كان نفسي ابوس ايدك و ابوح
أنا ليا انا مين غير حبك مين
يا ساييني بناري وكلي جروح
اه يانا من بعدك يا مراري
مين بس هيعطف على حالي
مين اللي هيسند ضهري ان مال
ومين اللي هقوله انا اسراري
من بعدك بقى اسمي يتيمة
ولا حاجة في عمري لها قيمة
انا قلبي وضهري بقى مكسور
والفرحة بقيت موضة قديمة
الأحد 2022/9/18
:
#ماجدة_البهيدى
:
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.