متسألش..أ. علي درويش
متسألش
***
بتسأل ليه؟ متسألش
على توتة وحدوتة
وقصة فيها مختلفين
كأنها دايرة مقفولة
تدوٌر فيها على حلقة
تكون دايبه عشان تخرج
تلاقي حاجه بتشدك
وبتقولك فايتني لمين
ومين غيرك هينصفني ويوصفني
يانن العين ؟
أنا بنت حوا وأنت عارف
بنت حوا تبقى مين
أنا الدلوعة والسنيورة والغندورة
وأنا اللي بدوخك من نظرة
ومن لمسة يطير قلبك
ولو زودتها شوية
تدوب في إدديا يا مسكين
أما جنتي الزايفة ،
بيسرقها أبو عين زايغة ..
ناقص الأدب والدين
وأنا الدلوعة والسنيورة والغندورة
والغالية اللي ما يروضها
غير فارس نبيل وأمين
وصاينة جمالي مدارية
عفيفة ، طاهرة ونقية
وصوتي بالكلام مايلين
ولو حابب أزيد في الوصف
أنا الأم اللي بتحن
أنا الأخت اللي من أهلك
أنا البنت اللي من ضهرك
أنا الزوجة اللي بوصالها تملي تضم
وتديلك حنان وحنين
تحب أزيد وأقول تاني
أنا الدلوعة والسنيورة والغندورة
اللي منكده عيشتك
وبالتكشيرة تلقاني كده في وشك
هتهرب مني وتروح فين؟
ومين يسمعني لما أقول :
هات ، مفيش ، عايزين
اتصرف زي كل الناس
مهو احنا مسؤلين منك
أنا وعيالك الحلوين
وفيه حاجه متتقالش
هقولها عشان متسألش
مابين مسح وطبيخ وغسيل
وربطة راسي بالمنديل
بكون زي العسكري في كمين
ويجي الليل وأنام جنبك
كأنك نار وأنا البنزين
تجيني شمال ألف يمين
وأقولك سبني تعبانه
وواخده للصداع قرصين
كده قلت اللي عندي خلاص
ومستنيه أسمعها
بتسأل ليه وعايز مين ؟
***
أنا ياحبيبتي مسألتش
لكني بقولها من قلبي
صريحة وواضحة وفي سطرين
يا أمي وأختي وحليلتي
وبنتي اللي يارب تكون
سبب للجنة يوم الدين
بحبك لما بتكوني
عفيفة ، رقيقة ، مستورة
مطيعة ، زكية ، وصبورة
شقية ، مشاغبة بس بلين
عشان تحلي الحياة بينا
ودايما نبقى متفاهمين
وأحطك تاج على راسي
وأشيلك جوه نن العين .
علي درويش
تعليقات
إرسال تعليق