وجع القلوب
كلمات ........ أيمن البكرى
مع كل نهار بيعدي
شمس بتروح للغروب
مهما كان الصبر ليه آخر
ومحدش فينا أيوب
وأصعب حاجه ف الدنيا
الحوجه لناس تانيه
وأصعب وجع هو
وجع القلوب
ومين فينا
منامش ف يوم مظلوم
مشافش أحزان وهموم
دي دنيا غريبه مش دايمه
عيشها وإرضي ب المقسوم
مسيرها قيامه قايمه
ومفيش حاجه فيها هتدوم
ومين فينا
مامشيش مع الهوجه
وغرق ف الموجه
فيه ناس سكتها معووجه
لا طايله شمال ولا طايله يمين
ما هى دنيا قلابه
وشوش غشاشه كذابه
يوم حلوه ويوم سوده
يوم تكون ف العالي
ويوم تبات مكسور وحزين
فين الناس إل بتحب الغير
فين ألاقي حد عندوا ضمير
ضاع تعبنا على الفاضي
ليه لما بنشوف شئ
كان زمان عادي
بنقول لسه الدنيا بخير
حد فيكم شاف
حد على التاني بيخاف
وواحد ممكن يأكلها حاف
علشان غيروا يبات شبعان
دى مش حاجات من الخيال
ولا غنوه ولا موال
دى صفات كانت موجوده
فينا زمان
عشقنا الكلمه التافه والأسفاف
وشوارعنا مبقاش فيها أي أمان
فين ألاقى ناس بتود
ناس بتبني مش بتهد
ناس بتحافظ على الوعد
مبيقفوش على الواحده لبعض
مش ناس كل همها
تجمع فلوس وتعد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.