🌹🌹🌹🌹🌹 أما يا أما 🌹🌹🌹🌹🌹
فاكرة يا أما
لما كنا صغيرين
كل حاجة . نشوفها حلوة
والله كنا . مبسوطين
لما بيتنا . كان صغير
والحيطان . مدهونة طين
كنا نصحى . الصبح بدري
بوسة منك . ع الجبين
لما كان الديك بيدن
دعوة حلوة
واحنا نوصلها بآمين
نجرى نقعد . جنب منك
وانتِ . بتروبي . العجين
صوت وابورك . جرى ريقنا
والسؤال ؟ الأكل فين ؟
احلى قعدة . ع الحصيرة
والصينية مجمعانا
فحضن ابونا . دفيانين
ننسى كل الكون . بضحكة
حلوة منك
والسند . كان ضهر أبونا
أصل أبونا . كان جبل
مليان حنين
لو طلبنا حتى منه . المستحيل
كلمته كانت تملي . من العينين
خدنا منكم . كل حاجة
كنتوا والله . شقيانين
كان أملكم . في الحياة
نبقى دايما . مستورين
عدى بينا . العمر كله
مهما نحسب . في اللي ليكم
مهما عشنا . تحت رجليكم . سنين
والله ما هتسوى . يا أمي . حتى ساعة
من اللي نمناها . في حجرك
بالأمان مطمنين
ليه يا دنيا
كل يوم . بتزيدي فينا . الآنين
واللي فاضل . بس لينا
حضن أمي
ودعوة بالرحمة لأبويا
يلا ندعي نقول
آمين
🌹🌹🌹🌹🌹🌹🌹🌹🌹🌹🌹
شادوليات
شاذلي محمد عبدالرحمن حسين .
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.