مانيش خايف..بالعامية أ.نصر سيد بدر

 مانيش خايف

مانيش خايف من الوحده

ولا الأحزان. ..

واخاف من ايه؟؟

واخاف علي ايه ؟؟

ما كل منايا كان اوهام

بيرسمها تعب الايام..

وفجأة صحيت من الأحلام 

والاقيكي في حياتي طيف..

سراب خادع..وكذب وزيف

واحلامي سحابة صيف ..

بتبدد مع النسيان..

  ....     ......

وبارجع تاني واتصالح مع نفسي

وباخد نفسي م الاحزان..

وباتصالح مع روحي..

واداوى تاني في جروحي..

وبتالم..لكني تاني بتعلم وباخد درس

مااسلم نفسي لعيونك..ولا للبسمه

او للهمس..

.....        .......

مانيش خايف وقلبي وحيد..

مانيش خايف يروح لبعيد..

لانه في يوم حايرجع لي..

وانه في يوم حايسمع لي..

ويكره ضعفه في عيونك..

وحايخونك..وينساكي..

ويكره انه يلقاكي..

ويكره انه كان قصه..

بتحكيها لاصحابك..وتتسلي

....        ......

مانيش خايف من الوحده ولا الاحزان

ماانا واخد علي الاحزان...

لأن  في قلبي انا انسان..

ولكني انا صابر..

ومش باغدر..لكن قادر..

علي النسيان..وحاانساكي

وحا انسي التجربه ديه..

يجف الدمع في عينيه..

تدور الدنيا حواليا..

وانا عايش .. نعم عايش

لكن والله مش عايش..

لأني  تركت اوهامي..

تزود حزن ايامي وحبيتك

واخاف من ايه ؟؟

واخاف علي ايه ؟؟

واخاف ازاي ؟؟

لان الخوف ده للعايشين

وانا ميت..مانيش عايش..

وبالتالي مانيش خايف..

من الوحده..ولا الأحزان. 

.....     ......     ....

شعر/نصر سيد بدر..القاهره.