وبقولك عاش
بقلم ماجدة البهيدي
++++++++++++
لو تندهني باجي واقرب
ولو عوزتك ألقيك تتهرب
العمر معاك ضاع على الفاضي
كنت الجلاد وكمان قاضي
انا قلبي بقى حيطانه مشروخة
ومش لقياه بيبان
من لفي وراك حاسة بدوخة
وساعات توهان
كنت برمم بس في روحك
ونسيت روحي وفاكرة جروحك
وإنت إللي شاغل بالك حالك
ومبتفكرش إلا في روحك
تعبت بجد و مش قادرة
كان حلمي كبير
آه والله صحيح صدق إللي يقول
عمر الحب ما ينفع أبدا من غير تقدير
إدييتك أكتر ما بتحلم وسامحت كتير
وأنا إيه إللي يخليني أكمل
مانا أفرفش روحي وأتجمل
ولا أشيل الهم ولا أتحمل
علشان واحد مش فارقه معاه
وضاربها طناش
وبقولك عاش
خليك لمزاجك وبرحتك
ومطرح مطروح شوف مصلحتك
ولا تشغل نفسك يوم بيا
حبيتك أيوه وإديتك أنا حنية
ووهبتك قلبي وحياتي وحتى الأنفاس
كنت ببديك عن كل الناس
كنت بعملك بميزان حساس
كان حضني أنا ليك دايما مسموح
إحساسي ومشاعري معاك
بين إيدك بس كتاب مفتوح
أنا عايزة أسمعها بكل وضوح
متقولي أنا ايه بالنسبة لك
أستنى أو أمشي كده واحد
معقولة بجد مش فارقه لك
أناا كنت بحبك حب جنان
إن جيت مرة وحسيت إن انا
محتاجة امان
كنت أجري عليك لجل أطمن
وأديلك بدل العمر حنان
دانا نظرة عيني مكتش بتطرف
في بعادك
وإن جت بصت مرة في بعدك
كنت بأنب نفسي عليها وبعاقبها
وأمنعها تشوف طيفك
بس لدقيقتين
على غلطة كانت مش مقصودة
وإن جتني ترفس و تعيط
كنت أسامحها وأقولها تاني تبقى بعودة
دلوقتى انا همسح في دموعي
وهخلي الماضي والحاضر
ملك لطوعي
من اللحظة دي
راح أعوض نفسي وهدلع
وأهتم بروحي وأهننها
ولا عاش ولا كان حد يهنها
وراح أنور ليلي وبشموعي
27/11/2023 الاتنين
:
#ماجدة_البهيدي
:
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.