نسيان...شعر/نصر سيد بدر

 نسيان...

ايام زمان..

انا كنت بشعر بالسعاده والأمان 

واحنا سوا...

ايام ماكنا في بحر حب

وكان بيسقينا الهوى

في الطريق اللي مشيناه

كنا بنرسم سكتي..

وعواطفي كانت شيء وليد

نفسه يعيش..

وبدال ما تحيي تموتي؟؟

دلوقت جيتي..غبتي..

شيء مايهمني ..

حبيتي غيرى..خنتي..اخلصتي..

لا شيء حايهز قلبي اطمني..

الخوف عليك مات في روحي وانطوى

وحقيقتي اني كبرت جدا ياحبيبتي ع الهوى 

ياذكرى ماشيه ورايا دايماً 

ارجعي ..

ياحبيبتي..لأ. .قصدى ياغريبه عني

ارجعي ..

مين السبب في اللي جرى ؟؟

مين اللي ضيع حبنا؟؟

انتي اللي بعتي..مش انا

خنقتي ليه حب الحياه في صدرنا

وهدمتي ليه عش السعاده والهنا؟؟

اوعاكي من بعد الفراق..

تبكي وتقولي .. حبنا..

ماانتي اللي بعتي..مش انا

ياللي عذابي يريحك..

ماكانش قصدى انا عتابي يجرحك

ماانتي السبب..

انتي اللي بعتي..مش انا

دلوقت جيتي..غبتي..شيء مايهمني

حبيتي غيرى..خنتي..اخلصتي..

لا شيء حايهز قلبي ..اطمني

الخوف عليك مات في روحي وانطوى

وحقيقتي اني..كبرت جدآ. .ياحبيبتي 

ع الهوى.

.......... ..............شعر

شعر/نصر سيد بدر   القاهره ..