(أُمي يا نبع الحنان)...زهير العسكري
(أُمي يا نبع الحنان)
يـا حـلاتــچ أُمِّـــي يــا نبــع الـــحنـان
شـمَّه منِّـچ تسـوى دنــيانه الــمـديــره
ليـش اشـوفچ چـن گمر وايــشع ضياء
لـن ضــيائـچ بالـضَّـلام ايــضـوي ديره
يـا بعـد روحــي الـــحنيـنه ام الــوفـاء
يـالـمشيــتچ بالـعبـــايه اجــمل أَميـره
يــا حـلات الــشَّـيـله الابريــسم عـليچ
ويَّـه الـعصابه اعلـه گصتچ بيهـا غيره
لـن غطت حتـى الـحواجب مسـتحاچ
يعنـي عفـه او تعـثر ابصـايه الـچبيـره
مـن كثـر طــول الـعبـــايه اتــورثيتــي
مـن خـدر مـولاتـچ الــحـره او عبيــره
أي عبيـــرچ منـــه الـيْـــفـوح الــحـياء
خلَّـه ابـويْ ايْخاف إذا شـاف الضِّفيره
خنصـر ايـدچ مـا طلـع بالـــسوگ يوم
خـو جـواريــبچ طبگ بــس مو مثيره
لــو غريــب ايشــوفـــچ ابكتــلةْ سـواد
يستحي ايباوع خجل بس من ضميره
حگـي اذا اتباهـا يا امـي اعلـه الرجـال
مــا اعمـهم قـصـدي للـمـا عنـده غيـره
وصَّــفت عشـر الـعشــر مـن الـحنـــان
أُمِّـي يـا منـبع جبل شــاعـذب غديـره
زهير العسكري
تعليقات
إرسال تعليق