روح يا شوق بقلمي/ خالد جمال
روح يا شوق
روح بسرعة لحد عنده
قولُّه كَفِّي انا لسه مًادُّو
غِبت ياما وقلت عدوا
حتى لو كان بابه سَدُّه
روح وكسَّر فيه وهِدُّه
جٌرّ فِيه من إيده شِدُّه
قولُّه بُعده عدَّى حدُّه
قوله قلبي مالوهشي بعده
هجره قطّع ف العروق
قوله تعبان من غيابه
قلبي آسى وطال عذابه
م الفراق هيضيع شبابه
قوله ييجي يدق بابه
قوله تايه نفسي افوق
قوله خايف تنسى وعدي
يهدى شوقك يوم ف بعدي
قولَّه دانتا مالكشي بعدي
خطِّي ع الأحزان وعدّي
ليلي بعده مالوش شروق
عمري قرّب ع الغيوم
بحر حيرتي فيه بعوم
قلبي غرقان ف الهموم
قوله لو يرجع ف يوم
ينتشلني ويبقى طوق
قلبي عمره ف يوم ما سابه
لو يلوم هقبل عتابه
قوله إيه م البعد نابه
غير عيون م الشكوى دابوا
غير فراق بالعند جابه
زي وحش علينا سابه
اشتهانا وسال لعابه
جه ونهشنا بسن نابه
أمر كان سهل اجتنابه
بالتأني و بالهدوء
روح يا شوق
بقلمي/ خالد جمال ٣١/٨/٢٠٢٥
تعليقات
إرسال تعليق