غفِّلني...أ. خالد جمال
غفِّلني
كت أحلى وأجمل تغفيلة
دبت أنا من نظرة وتسبيلة
حاصرتني رموش ماقدرتش احوش
ولا قلبي معاه كان ليه حيلة
خد مني العقل وغفلني
ولقيتني ف لحظة بتوه مني
خطفتني عنيه ماسألتش ليه
ولا حتى طلبت يفهمني
أول ما عنيك بصث ليا
وناديت على قلبي بحنية
طبيت علطول وبقيت مشغول
ولا حد كمان سمَّى عليا
دانا عمر الوعي ما غاب عني
ولا عشق وشوق يوم نال مني
شفتك حبيت وناديت لبيت
وصالحني الزمن اللي خاصمني
على قلبي كتير مر وعدى
ياما شفت عيون غاوية مواعدة
حسيت بيه قريب مش حد غريب
بعرفه من بدري ومن مدة
كت أول مرة فيها اتغفل
كان رمشي صاحيله إزاي قفِّل
طوى رمش العين خده ف دقيقتين
ولقيتني بقوله كمان غفل
ابو أحلى عيون وخدود حمره
ابو رمش بيكوي كما الجمرة
والشهد ده نيل ف شفايفه يسيل
وبيسكر روحي كما الخمرة
ابو خال ع الخد وفيه زهرة
وعلامة الحسن عليه ظاهرة
والشعر ده ليل بيقول مواويل
بنغني معاه وتحلى السهرة
مين قال دانا تهت بتغفيلة
دانا فقت يا ناس م التعسيلة
من قبل هواه ضاع قلبي وتاه
كت عايشة الروح فيا عليلة
بقلمي/ خالد جمال ٢٥/١٠/٢٠٢٥
تعليقات
إرسال تعليق