بلياتشو...الشاعر: حليم محمود أبو العيلة
بلياتشو
عايش بلياتشو وأراجوز
كُل حاجة مِن جِوه غير بَره
يوهِمك بحقيقة غير طبعُه
دهب عِيرة وقِشرة بالمرة
بِوش بَشوش لكن بِقناع
تعاشرُه الحلوة تتقلب مُره
والعيشة تبقىٰ خصام نِد بنِد
ويمرر عليك عيشتك تقول ضُرة
يعيش لتات وكمان طماع
ويحلب خيرك كما البقرة
كَلامه كِتير ونافخ كير
لِكلاك ولسانه تِضربُه ف عَشرة
باصص ف مَالَك يتمنى يزول
بياع يبيع السنين والعِشرة
مناخيرُه ف كل حاجة وحشري
نقول حَشَرَة والله بنظلِم الحَشَرَة
كلماتي:
الشاعر: حليم محمود أبو العيلة
مصر
تعليقات
إرسال تعليق