أنا الفارس بقلم صلاح رزق
صوت السكون فى حُضن التوتَه والضِله
وريحة الطمي ولون الخُضره والغله
يرُد الروح لروح تايها فى أحزانها
وأوجاعها. تدوب وتطيب
بِشَربِة ميه م القُلَّه
ونسمة ريح وصوت البلبل الدافي
فى ضي النور بقلبه الطيب الصافي
وضِحك الميه للساقيه
بِفَرحَه وهي شَيْلاها
توشوشها وترميها
فى حِجر النبته والزرعه
ويتغير بنا المشهد
ونسرح فى الفضا الواسع
وصوت م القلب بتوَجَّع
يرجعنا لِأحزنا
لدنيتنا اللي نعرفها
ببلاويها وأحداثها
يثور المنظر الواضح
ويستهزئ بإحساسنا
كأن الحزن دا فاضح
وداء بيفت أرواحنا
وحاول ارجَّع المشهد
وامسك تاني فى المنظر
وحارب كل أوهامي
وأوجاعي وأحزاني
وخوفي يقولي ما هتقدر
ويجي المشهد الأول
يحوَّطني بميت حارس
وأصرخ فيها تسمعني
أنا الفارس
وكل ما فيا يندهني
بسيطه الدنيا أهي خالص
يمر الليل ومتوشح بأحلى نجوم
إِيديه فى إدين قمر صاحي
بضحكه وطلله تملا الكون
يداعب كل مشاعرنا
يحط أمَانُه فى قلوبنا
كإنَّا بجد أطفاله
وأم حنونه تحكلهم
قصص للنوم
بسيطة الدنيا أهي خالص
ومليانه حياة بتفور
بشمس غروبها وشروقها
بنظرة من.
عيون الحور
كأنها حلوه تتدلع
بطله ورقه ومشاعر
وتتمنع ع خُطابها
وتضحك لما يغازلها
كلام الحب من شاعر
يلخبطها بأوصافه
وبالكلمه اللي بغزلها
بروح الحرف والمعنى
ويعلنها لعزاله
أنا الفارس
بسيطه الدنيا أهي خالص
أنا الفارس
بقلمي صلاح رزق
تعليقات
إرسال تعليق