روتينها سكات...م. حمدي توفيق

 روتينها سكات

...................

بُرغم إننا مع بعض

لكني.. وحداني

ينفع نعيش كدا

من الغربة بنعاني؟

جوايا ياما كتير

ومش قادر أقول تاني!!

بنتقابل وبس وِشوش

والروح ساكنها بس

 وجداني

وبقى بينا الكلام مهجور

حروف ملهاش خيار

 تاني

بنبص في ساعاتنا

ونداري نظراتنا

وكأننا إغراب

ونعدها... ثواني

بتعدي بينا أيام

روتينها بس سكات

ونخاف من التفاصيل

تخلق كتير أزمات

فنضحك على روحنا

بضحكة أو غمزات

ممكن نقوم الصبح

نلاقي شبابنا فات

مين اللي غيّرنا؟

ومين قَسّى قلوبنا؟

وليه طريق الوصل

بقى بس لعيوبنا؟

كنا زمان قلبين

من عشقهم... دوبنا

دلوقتي مش عِارفين

ليه الحب أهملناه

وإهتمينا بذنوبنا!!!

......

قلمي 

م. حمدي توفيق