الملكة خاصة ترجع..ج3..حنان حلمي
الجزء الثالث: الملكة خاصة ترجع
الملك قلبه وجعه بس سمع كلام الوزير، ونادى النجار وعمل صندوق على قدها بالظبط فيه خرمين صغيرين عشان تتنفس، ورموه في البحر.
وكان فيه صياد غلبان بيرمي شبكته، طلع له الصندوق، افتكره كنز، فتحه لقى فيه الملكة خاصة!
مراته قالت: ايه ده؟ بنت؟ احنا ناقصين هم؟ قالت لهم خاصة: اقفلوا الصندوق وارموني تاني. قالها الصياد: معاذ الله، رزقنا على الله.
حكت لهم حكايتها، والصياد قال: هرمي الشبكة على وشك. وفعلاً بقى كل ما يرمي الشبكة على وشها يطلع سمك كتير، وبقى عندهم خير كتير.
خاصة قالت للصياد: هات صوف وإبر، وبدأت تعمل شيلان وتكتب على كل شال "شال الملكة خاصة". الستات اتجننت على الشيلان وبقى صيتها في كل المدن.
وفي يوم الملك كان هينسى ويدور على عروسة جديدة، شرطها كان: عايزة شال الملكة خاصة! الملك استغرب وقال معقول هي؟ أنا رميتها بنفسي في البحر!
بعت الوزير نفسه يروح يشوف مين دي. الوزير راح السوق وفضل يراقب الصياد لحد ما وصل لبيته، وسمع خاصة بتنادي: يا أبي زود الصوف! عرف انها هي، خبط على الباب وقال: مش هسيبك، انتي ملكي!
خاصة عرفت انه مش هيسيبها، ومرات الصياد قالت: لازم الحق يرجع، اكتبي رسالة للملك. الصياد خد الرسالة وطار على فرس سريع للملك.
الملك قرا الرسالة وركب حصانه وكان بيسابق الريح عشان يلحق قبل ما الوزير يرجع بالليل ياخدها بالقوة. وصل واستخبى في بيت الصياد، ولما الوزير اقتحم البيت لقى الملك قدامه، قال: ما جزاء الخيانة يا وزير؟ وقبض عليه الحرس ورجعت الملكة خاصة لمملكتها وولادها.
وتوتة توتة فرغت الحدوتة.
هنا طنط عايدة نطت وقالت: وأنا معاكي يا حنين!
حنين كانت محوشة ١٠ آلاف جنيه، وطنط عايدة باعت حتة الدهب اللي عندها، وجابوا مكنتين صغيرين وبدأوا ورشة صغيرة في أوضة حنين، وكل شنطة يكتبوا عليها "الملكة خاصة".
واحدة واحدة الورشة بقت مصنع كبير، وكل الستات بتحلم بشنطة من عندهم عشان مفيهاش غش.
وفي يوم وحنين واقفة في مصنعها، دخلت عليها ست ومعاها بنتها عايزة تشتري كمية كبيرة لمحل بنتها.. كانت هي نفسها صاحبة المصنع اللي فصلتها!
وشها اصفر أول ما شافت حنين.
حنين ابتسمت وقالت بهدوء: "أهلاً.. فاكرة أول مرة جيتلك بتصميماتي وقلتيلي شغلك مينفعش؟ دلوقتي جاية تشتري نفس الشغل عشان تبيعيه في محلك؟"
انتهت.
تعليقات
إرسال تعليق